Ezamiyyət zamanı əmək haqqının hesablanması
Ezamiyyət zamanı əmək haqqının hesablanması
Ezamiyyətə göndərilən işçilərin əmək haqlarının düzgün və qanunvericiliyə uyğun formada hesablanması həm işəgötürən, həm də işçi baxımından mühüm əhəmiyyət daşıyır. Bu yazıda Azərbaycan Respublikasının Əmək Məcəlləsinə istinad edərək, ezamiyyət dövründə əmək haqqının hesablanma mexanizmini praktik nümunə ilə izah edirik.
Qanunvericiliyin tələbi
Əmək Məcəlləsinin 179-cu maddəsinin "x" bəndinə əsasən, işçi yaşadığı inzibati ərazi vahidindən kənara və ya xarici ölkəyə ezam olunduqda onun iş yeri və orta əmək haqqı saxlanılır.
Bu norma onu göstərir ki, ezamiyyət səbəbilə işçinin iş yerindən müvəqqəti ayrılması onun əmək haqqının azaldılmasına və ya dayandırılmasına əsas vermir. Həmin müddət üçün işçiyə orta əmək haqqı tam şəkildə ödənilməlidir.
Orta əmək haqqının hesablanma qaydası
Əmək Məcəlləsinin 177.2-ci maddəsinə görə, əmək məzuniyyəti halları istisna olmaqla digər bütün hallarda orta əmək haqqı belə müəyyən edilir: ödənişdən əvvəlki iki təqvim ayı ərzində əldə olunan ümumi əmək haqqı həmin aylardakı iş günlərinin sayına bölünür, bir günlük orta əmək haqqı tapılır və bu məbləğ əmək haqqı saxlanılan günlərin sayına vurulur.
Ezamiyyət günlərinə görə ödəniş də məhz bu qaydaya əsasən aparılır.
Praktiki nümunə
"A" MMC müəssisəsi işçisini 2024-cü ilin dekabr ayında 5 iş günü müddətinə ezamiyyətə göndərmişdir. İşçinin oktyabr və noyabr ayları üzrə aylıq əmək haqqı hər ay üçün 800 manat olmuşdur. Dekabr ayında isə 20 iş günü müəyyən edilmişdir.
Oktyabr ayı
İş günlərinin sayı: 23
Aylıq əmək haqqı: 800 manat
Noyabr ayı
İş günlərinin sayı: 19
Aylıq əmək haqqı: 800 manat
Addım 1: Orta gündəlik əmək haqqının müəyyən edilməsi
İki ay üzrə ümumi qazanc: 800 + 800 = 1600 manat
İki ay üzrə ümumi iş günü: 23 + 19 = 42 gün
Orta gündəlik əmək haqqı: 1600 / 42 = 38,10 manat
Addım 2: Ezamiyyət günlərinə görə ödəniş
Ezamiyyət müddəti: 5 iş günü
Ezamiyyətə görə əmək haqqı: 38,10 × 5 = 190,50 manat
Addım 3: Ezamiyyətdə olmayan günlər üzrə əmək haqqı
Dekabr ayı üzrə hesablanma
Ümumi iş günləri: 20
Ezamiyyət günləri: 5
Qalan iş günləri: 15
Dekabr ayı üzrə gündəlik əmək haqqı: 800 / 20 = 40 manat
Ezamiyyətdə olmayan günlər üçün əmək haqqı: 40 × 15 = 600 manat
Addım 4: Dekabr ayı üzrə yekun əmək haqqı
Cəmi əmək haqqı: 190,50 manat (ezamiyyət) + 600 manat (digər iş günləri) = 790,50 manat